It-Tnedija tal-album ta’ Djun

It-tieni lejla tat-tnedija tal-album Il-Ħlas tal-grupp Djun f’Palazzo de la Salle kienet lejla ta’ mużika u lirika mill-aqwa.

Komplejtu twessgħu l-orizzonti tal-kanzunetta. Il-ħsejjes, il-kliem, l-emozzjonijiet. Warrabtu l-frażijiet prevedibbli, il-klixejiet. Għarrixtu fil-fond tal-memorji, tal-mistoqsijiet li ma jħalluniex bi kwietna, tal-esperjenzi li għalihom m’hemmx kliem. Kantajtu dwar dak li mhux faċli tkanta dwaru u xorta żżomm udjenza fuq ix-xwiek.

Grazzi ta’ dan ix-xogħol Charles, Justin, Ryen, Michael, u Paul. Xtaqtkom bqajtu ddoqqu u tkantaw imqar siegħa oħra.

Ilni ġimgħat nisma’ erbgħa mill-kanzunetti, kultant b’mod ossessiv. Issa għandi s-sett kollu u għandi bżonn ħafna ġimgħat biex nassorbihom. Bejn bix-xogħol li għandi b’lura u d-Djun li rrid naqta’, għandi l-bqija tas-sena okkupata.