Xi darba rrid nikteb storja dwar logħba futbol taż-żgħażagħ f’Malta. Kemm jista’ jkun reali. Imma ma nafx kemm jifilħu jaqraw dagħa u kliem ħażin in-nies. Kemm jifilħu jisimgħu osservazzjonijiet dwar il-ġisem tal-bniedem, dwar dak li tara u dak li ma tarax. Nikteb storja dwar in-natura tal-bniedem fil-mument kreattiv tal-anarkija.
Il-players jissaraw fuq il-ħaxix artifiċjali huma fjur ħdejn il-marmalja li sikwit ikun hemm fil-ġenb jew wara x-xibka tal-ħadid. Ħafna drabi l-players jippruvaw jagħtu eżempju. Imma dawk li mhumiex jissaraw b’mod sportiv jagħmlu minn kollox biex isaħħnuhom sakemm jibdew jagħlu.
Kultant l-uffiċjali tal-logħba jkunu inkompetenti u l-iżbalji ġenwini jew mhux ġenwini tagħhom ikomplu jsaħħnu l-irjus.
Imma l-virus ewlieni mhux qiegħed fuq il-pitch. Qiegħed band’oħra. F’ħafna diriġenti u ġenituri li suppost qegħdin hemm biex jagħtu l-appoġġ tagħhom liż-żgħażagħ ta’ fuq il-pitch imma minflok iridu jkunu l-protagonisti huma.
Naħseb li jekk nasal biex nikteb din l-istorja nkun qed nagħmel ħbieb ġodda…
adriangrima.org 