Kumment ta’ Adrian Grima lil Omar Seguna ta’ It-Torċa dwar l-edizzjoni tal-2015 tal-Festival Mediterranju tal-Letteratura ta’ Malta
Din is-sena ġew il-Festival mat-800 ruħ, żieda sostanzjali fuq is-sena l-oħra. Kull sena qed ikollna dejjem iżjed nies, iżda dis-sena kien hemm qabża ikbar. Minn dak li qed jgħidulna n-nies, jidher li hemm tliet raġunijiet għal dan is-suċċess: il-fatt li sar, għall-ewwel darba, fil-pjazza ewlenija tal-Forti Sant’Iermu, spazju majestuż iżda li fl-istess ħin jilqgħek; l-awturi li ħadu sehem, li fosthom, għal min huwa midħla tax-xena letterarja internazzjonali, kien hemm ismijiet kbar u magħrufin sew; u l-promozzjoni li għamilna fil-gazzetti u t-televiżjoni ftit jiem qabel ma beda l-festival u fuq l-internet.
Dis-sena, għall-ewwel darba wkoll, fl-għaxart ijiem ta’ qabel il-festival, fuq l-internet bdejna ntellgħu żewġ filmati kuljum ta’ siltiet ta’ qari mill-festivals li saru fis-snin li għaddew. Bdejna għaxart ijiem qabel għax din kienet l-għaxar edizzjoni tal-festival.
Hemm fatturi oħrajn li jiġbdu lin-nies lejn il-festival, fosthom il-fatt li hemm għadd kbir ta’ żgħażagħ involuti bħala voluntiera fl-organizzazzjoni tiegħu. Dawn iġibu magħhom kreattività u enerġija. Iżda l-udjenza hija mħallta: żgħażagħ, kbar, anzjani, Maltin, barranin. Hemm spazju għal kulħadd, għal kull min iħobb il-letteratura, hu min hu.
Fil-festival nippuntaw dejjem fuq il-letteratura l-ġdida ta’ kwalità, u minkejja li jkun hemm affarijiet oħrajn, fosthom il-“films tal-poeżija,” ma nagħmlux kompromessi maċ-ċentralità tal-letteratura, mal-kelma mitkellma quddiem udjenza attenta. In-nies draw il-festival: ħafna nies issa jafu bih, u jafu x’joffri. Imma jafu wkoll li kull sena jkun hemm elementi ġodda. Qisu ktieb. Kull sena għandek ktieb, imma kull ktieb huwa differenti, u esperjenza dejjem ġdida.
adriangrima.org 