It-Tnejn, 3 ta’ Ġunju 2013, 6.30pm
Id-Dipartiment tal-Malti, l-Akkademja tal-Malti u l-Għaqda tal-Malti – Università qed iħejju serata flimkien mal-Uffiċċju tal-President ta’ Malta bl-isem ta’ Fil-Ħolma tal-Poeta biex jitfakkar il-poeta Rużar Briffa f’għeluq il-50 sena mill-mewt tiegħu. Din il-kommemorazzjoni se ssir it-Tnejn 3 ta’ Ġunju 2013, fil-Palazz ta’ San Anton.
Din se tkun preżentazzjoni multidixxiplinarja ta’ motivi magħżula ta’ Briffa fil-forma ta’ qari, drammatizzazzjoni, materjal viżiv, u lirika mmużikata. Se jkun hemm ukoll kummenti kritiċi qosra minn Oliver Friggieri, Immanuel Mifsud u Adrian Grima, li ntalab jitkellem dwar ix-xewqat mhux mitmuma li jitkellem dwarhom Briffa f’għadd ta’ poeżiji rappreżentattivi tiegħu.
Din is-serata se tkun wirja straordinarja ta’ kollaborazzjoni bejn tliet entitajiet tal-Malti (id-Dipartiment, l-Akkademja, u l-Għaqda tal-Malti) f’ġieħ poeta li ma jistħoqqlu xejn inqas.
Ritratti mill-kommemorazzjoni (ħajr lill-Uffiċċju tal-President tar-Repubblika):
adriangrima.org 