Qari minn “xtaqt li kont merkurju”

Nhar il-Ħamis 27 ta’ Lulju fit-20:00 fil-Couvre Port, il-Birgu, qrajt traduzzjoni tiegħi tal-poeżija “Qabar” ta’ Tsead Bruinja waqt lejla ta’ qari mill-ktieb Xtaqt li kont merkurju (Inizjamed, 2022) organizzata minn Inizjamed. Bruinja kien ħa sehem fil-Festival Mediterranju tal-Letteratura ta’ Malta fl-2013.

Dawn ir-ritratti ħadhom Ken Scicluna għal Inizjamed. Ir-ritratti kollha li jinsabu fuq il-paġna ta’ Facebook ta’ Inizjamed.

L-ARTI TAL-KLIEM U FROTT IN-NUMRI

Bejn il-qxur ta’ xtaqt li kont merkurju hemm l-arti tal-kliem u frott in-numri, għax din hija pubblikazzjoni li tirrappreżenta 61 poeta minn madwar id-dinja, 24 traduttriċi u traduttur Maltin, 25 sena t’Inizjamed, u 17-il sena tal-Festival Mediterranju tal-Letteratura ta’ Malta.

It-titlu xtaqt li kont merkurju huwa l-ewwel vers ta’ waħda mill-poeżiji fil-ġabra, u ngħażel għax in-natura flessibbli u trasformattiva tal-merkurju, metall likwidu, tirrappreżenta l-flessibiltà meħtieġa fil-proċess tat-traduzzjoni letterarja u l-ħila trasformattiva tiegħu. Bħalma jikteb Adrian Grima fid-daħla ta’ dan il-ktieb, mhuwiex biss it-test oriġinali li “jinħoloq mill-ġdid, imma l-lingwa li biha ssir it-traduzzjoni”.

Għalhekk, sabiex niċċelebraw din il-ġabra ta’ poeżiji li ħarġet fl-2022 u tnediet waqt il-Festival Mediterranju tal-Letteratura ta’ Malta tal-istess sena, se niltaqgħu nhar il-Ħamis 27 ta’ Lulju fit-20:00 fil-Couvre Port, il-Birgu, propju minn fejn beda l-Festival. Dakinhar se jkun hemm qari minn uħud mill-aqwa poeżiji tradotti fil-Festival, kif ukoll mużika u tazza nbid.

Fost il-qarrejja se jkun hemm Keith Borg, Leanne Ellul, Antoine Cassar, Jean Paul Borg, John P. Portelli, Rita Saliba, Simone Inguanez, Ken Scicluna u l-edituri tal-istess ġabra ddedikata lil Maria Grech Ganado: Kit Azzopardi, Claudia Gauci u Justine Somerville. Noah Fabri se jagħtina numru ta’ kanzunetti minn tiegħu wkoll.

Id-dħul huwa b’xejn u s-serata se tkun bil-Malti.

Din l-attività qed tittella’ bl-għajnuna tal-Kunsill Lokali tal-Birgu. Din l-attività qed tittella’ wkoll bi tħejjija għall-Festival Mediterranju tal-Letteratura ta’ Malta 2023 li se jittella’ bejn il-21 u s-27 ta’ Awwissu. Aktar tagħrif jinkiseb mill-attività fuq Facebook.

Inizjamed