Mhux se niddejjaq ngħidha. Kburi ħafna, bħala parti mit-tim ta’ Inizjamed u l-Festival Mediterranju tal-Letteratura ta’ Malta bejn l-1998 u l-2018, li Abdulrazak Gurnah għadu kemm rebaħ il-Premju Nobel għal-Letteratura. Abdulrazak kien qara fil-Festival ta’ Malta fl-2014. https://www.inizjamed.org/writers-2014/writers-2014-b/
Niftakar il-personalità straordinarja imma anki l-umanità kbira tiegħu, minkejja li kellu ħafna biex jiftaħar u jitkabbar. Bniedem verament taz-zokkor li japprezza dak kollu li tagħmel miegħu u li kien lest jieħu sehem f’festival li, ħdejn avvenimenti oħrajn madwar id-dinja, ejja ngħiduha, mhuwiex l-ikbar wieħed.
Kien ġie bil-ħila ta’ Norbert Bugeja, li jafu personalment, u minbarra li kien qara mix-xogħol tiegħu, kien intervistah fuq il-palk David Schembri. Kienet intervista memorabbli. Niftakar lil Nathalie tgħidlu li jixbah lil Morgan Freeman u lil Abdulrazak jirrikonoxxi, b’nofs tbissima, li ġieli qalhielu ħaddieħor.
Hemm awturi oħrajn tal-Festival ta’ Malta li rebħu premjijiet kbar. Ftit xhur wara li minn fuq il-palk tal-Festival f’Sant’Iermu (2015) qara minn ktieb li kien għadu ma ħariġx għall-bejgħ, Hisham Matar rebaħ il-Premju Pulitzer proprju bil-ktieb tiegħu The Return.
U Leanne Ellul għadha kemm ġibditli l-attenzjoni li din is-sena, Monique Roffey, awtriċi oħra tal-Festival (2013) li kienet ħadet sehem bil-ħila tal-British Council u Ingrid Eomois, rebħet il-Premju Costa.
Grazzi lill-voluntiera kollha li jaħdmu sigħat twal u b’qalb kbira biex isir dan il-Festival uniku. B’xi mod, dan il-Premju Nobel għal Abdulrazak Gurnah huwa rikonoxximent tax-xogħol tagħhom ukoll.
Ħajr ukoll lill-Kunsill Malti għall-Arti li jagħti l-appoġġ imprezzabbli tiegħu lill-Festival permezz tal-fondi u l-għajnuna professjonali tiegħu.
adriangrima.org 