Dun Karm, 1921 Lil Ħuti l-Maltin

Nhar l-Erbgħa, 13 ta’ Ottubru 2021 fil-Mużew tal-Arkeoloġija, il-Belt se ssir serata mużiko-letterarja organizzata minn Festivals Malta bi sħab mal-għaqdiet tal-Malti biex tfakkar għeluq il-mitt sena mill-innu ta’ Dun Karm, “1921 – Lil Ħuti l-Maltin Nhar l-Għoti tal-Kostituzzjoni.”  

F’din is-serata se jkun hemm diskussjoni li fiha l-istoriku tal-lingwa u l-letteratura Maltija Joseph Borg, il-kritiku letterarju Adrian Grima u l-istorika Simone Azzopardi se jitkellmu fuq aspetti differenti ta’ din il-poeżija ta’ Dun Karm.  Id-diskussjoni se titmexxa minn Rita Saliba. Fil-lejla se jieħu sehem il-kompożitur Dominic Galea u l-kantanta Dorothy Bezzina.

Adrian Grima jgħallem il-letteratura Maltija fl-Università ta’ Malta u kors dwar il-Malti fl-Inalco ta’ Pariġi. Ħa sehem f’konferenzi akkademiċi f’diversi pajjiżi u kiteb għadd ta’ studji bil-Malti, l-Ingliż u t-Taljan dwar il-letteratura u l-kultura. Bejn l-1998 u l-2018 kien il-koordinatur ta’ Inizjamed li tmexxi l-Festival Mediterranju tal-Letteratura ta’ Malta. Fl-2011 ħareġ l-istudju “Minn kull xorta ta’ qżież.” Dun Karm u l-konfini tal-identità fil-mument tal-metafora. Fl-2013 ħa ħsieb l-ewwel konferenza nazzjonali interdixxiplinarja fuq Juann Mamo u kien l-editur ġenerali tal-ewwel tliet kotba fis-Sensiela Juann Mamo (SKS). Bħalissa qed jaħdem fuq il-manuskritti ta’ żewġ rumanzi ta’ Concetta Brincat tal-1919 u l-1922. https://adriangrima.org/