Il-poeżija “B’Idejna” ktibtha fl-10 ta’ April 1997. Dehret għall-ewwel f’antoloġija ta’ kitbiet letterarji bl-isem ta’ Il-Millennju Jistenna lill-Maltin maħruġa mill-Koperattiva Kulturali Universitarja u Inizjamed f’Lulju tal-1999. Ma ktibthiex għal dan il-ktejjeb jew għall-attività letterarja li tellajna f’dak is-sajf fid-daħla prinċipali tal-Università. Daħħaltha f’din l-antoloġija għal deherli li kienet relevanti għaliha.
B’Idejna Waqt l-innu nazzjonali ma nkunx naf x’se naqbad nagħmel b’idejja. Huma jaħasra jistennew mumenti bħal dawn bil-ħerqa, għax niftakar fihom kif inhuma, mhux bħala strumenti f’idejja. L-innu tagħna, niskopri kull darba, jindaqq biex ifakkarni li jien dak li jien, li nilbes dil-ġilda lewn ix-xemx u dan il-moħħ lewn ix-xagħri. Meta nħares lejn l-oħrajn nintebaħ x’għandi nagħmel u ġieli nitfa’ jdejja wara dahri. Inħossni qisni spalliera li waħedha baqgħet tistenna li titgħatta; fidil f’salib it-toroq jitħabat ma’ stering ta’ karozza li ma tridx tistartja; poplu qed jistenna wara l-bieb ta’ uffiċjal pubbliku biex isir nazzjon, mingħajr ma jemmen fil-kredenzjali tiegħu stess, jew fl-utilità. Darb’oħra forsi npoġġihom quddiem għajnejja u nsodd widnejja, f’salt.
