L-ewwel sessjoni – Is-Sibt 15 ta’ Novembru 2025
B’xi mod, ma nafx eżatt għaliex, l-esej personali jeħles ix-xitan tal-kitba minn ġol-gaġġa tal-kliem.
F’dawn ir-ritratti meħudin waqt l-ewwel workshop tas-sensiela l-ġdida ta’ Ġisem. Ġrajja. Post. fi Xrobb l-Għaġin, ma jidhrux xjaten, imma serrħu raskom li ġejjin.
U lanqas ma nidher jien qed nitpaxxa bil-kitbiet.
Ħajr lil Essays Beyond Borders.
It-tieni sessjoni – Is-Sibt 22 ta’ Novembru 2025
Fit-tieni sessjoni tal-kitba tal-esej personali minn sensiela ta’ tlieta dwar Ġisem. Ġrajja. Post. fi Xrobb l-Għaġin ħarist lejn dak li jgħid ir-rumanzier Tim Parks fuq l-esej kif jiktbu Michel de Montaigne: il-vuċi personali dejjem fittiexa; it-tluq mingħajr destinazzjoni ċara; l-ironija fietla; il-libertà stinata.
Qabel ma bdejna semmejt l-esej li kont għadni kemm irċevejt mingħand Lou Drofenik mill-Awstralja bħala parti minn dawn il-workshops, u l-eċitament ta’ ġmiel ta’ kitba mis-salini ta’ “Xorb l-Għaġin”.
Imbagħad tliet sigħat ta’ kitba u wara siegħa u nofs nisimgħu l-kitbiet tal-parteċipanti. Id-diskussjoni kienet fil-fond u fit-tul, speċjalment dwar il-vuċi u dwar il-lingwaġġ.
Suppost kellna nagħmlu ħames sigħat. Imma biex nirrispettaw il-libertà tal-esej personali, in-nuqqas ta’ destinazzjoni fissa, ħadna d-deċiżjoni kollettiva li niddawru.
Sadattant, fl-isfond, naf li hemm esejs oħrajn qed jinkitbu. Dwar postijiet u ġrajjiet differenti. Imma bl-istess ħila. Bl-istess passjoni.
Ħajr lil Essays Beyond Borders.
It-tielet sessjoni – Is-Sibt 29 ta’ Novembru 2025
It-tielet u l-aħħar workshop tal-kitba tal-esej personali għall-pubbliku. Did-darba tkellimna dwar it-tranżizzjoni bejn partijiet differenti tal-esej, ngħidu aħna bejn ir-rakkont ta’ ġrajja personali u oħra, jew bejn ġrajja personali u riflessjoni riċerkata.
L-esejisti qraw dak li kitbu u saħħruna bil-kitbiet kommoventi u intelliġenti tagħhom. L-esej personali kapaċi jeħles ħafna xjaten minn ġol-morsa tal-kliem.
Imbagħad Angelique Lofaro, voluntiera ta’ Nature Trust, dawritna mas-sala fil-park naturali ta’ Xrobb l-Għaġin fejn hemm sezzjoni edukattiva dwar annimali li jgħixu fis-salvaġġ u li jdewwuhom il-voluntiera, bħas-sriep.
Rajna wkoll il-fkieren li għandhom fit-tankijiet u mbagħad uħud mill-qniefed li qed ifiqu mill-ġrieħi jew mill-mard tagħhom biex jerġgħu mbagħad jitilquhom fis-salvaġġ.
Il-workshops ta’ “Ġisem. Ġrajja. Post.” saru fi ħdan il-proġett Ewropeaw Essays Beyond Borders immexxi mill-università ta’ Malta, b’kofinanzjament tal-Unjoni Ewropea.
adriangrima.org 